بابكر سلك

بابكر سلك
الدنيا ساكانا



·الفنان محمد منير
·محمد منير المصري
·المصري زي الحضري
·عندو اغنيه بقول فيها
·اشكي لمين واحكي لمين دنيا بتلعب بيييييييييييينا
·تلعب بينا
·وتشتكينا
·وابراهيم عوض الرائع الراحل غني
·احكي الم الفراق واشكي لي مين انا
·والامثال التي تتحدث عن الشكوي كتيره
·الشكيه لي اب ايدا قويه
·انتوا قايلين الاتحاد الافريقي ده اب ايدا قويه ؟؟؟
·طوالي مشتكين مشتكين مشتكين !!!
·اب ايدا قويه المقصود في المثل هو رب العباد خالق العباد
·وهناك مقولة تقول
·الشكيه لغير الله مذله
·واغنيه ابراهيم عوض تناسب حالت اخوتنا في الاتفاقيه
·يحكوا الم فراق البطوله
·ويشكوا
·يشكوا لي منو بس ؟؟؟؟
·اي مره طاروا
·قالوا اشتكوا
·وشكوا
·وتشككوا
·وقالوا آخر شكوي سببها ان المالي غير اربعه لاعبين
·خلوهوا المالي
·الله يسألكم
·فداسي ده في زول شافوا قبل يدفروهوا دفير عشان يشوت البلنت
·دخل متين
·وبدل منو
·ولو في محاسبه للحكم مفروض يحاسبوهوا علي دي
·غايتو منظر فداسي واقف وسط الباقين في دائرة السنتر
·ويدفروهوا لي بره
·ويرجع تاني وسط الكوم
·ذكرني يوم مشيت اجيب خروف الضحيه
·وقفت في الكوم
·اخترت خروف
·اجي اجرو بره الكوم
·يجري يرجع وسط الكوم تاني
·باقي الخرفان قربوا يقولوا ليهو امشي معاهو
·سبب الشكوي ده مطرشق
·اديكم سبب وجيه للشكوي
·وبكسبكم النتيجه
·مضمون علي حسب قول قرن هلال
·اقصد قرن شطه
·اشتكوا
·قولوا الحكم السنغالي ماعندو شنب
·والكلام ده ماصاح من راجل كبير وحكم دولي
·وعدم الشنب ده بجيب عدم الاحترام
·اسي مثلا انا
·لو داير امسح شنب الحكم
·امسح شنو ؟؟؟
·الشكوي دي مضمونه
·رسلوها للاتحاد الافريقي
·عشان تلعبوا الختام في الكنغو
·وتجيبوا الكاس
·وتتحقق مقولتكم
·بتاعت الهلال جاب كاس من الكنغو
·المكنه الربطتوها زمان ديك
·مريخابي رائع جدا
·رسل رساله
·قال لي الهلال كسب الشكوي التانيه
·الشكوي القال فيها رجل الخط البهناك ما لابس شراب
·واتشكي
·اتشكي تاني
·شكايه خلاص
·متمني يوم الهلالاب يقولوا طرنا لانو مستوانا كده
·موش في اغنيه بتقول
·حم حم تعال يا حمام *****شتت ليك سكر
·ولما تطير كمان ياحمام ***اثبت وما تتعذر
·المهم
·واحد قال لي المريخ مات والهلال مات
·قلت ليهو موافقين لكن في فرق بين المرحومين
·المريخ عندو تركه اسمها مانديلا
·دايره ليها اعلام شرعي وتوريث
·لكن الهلال
·معاش ماعندو
·يعني مافي داعي للاعلام الشرعي زاتو
·ادفنوا ساي واسكتوا
·اها
·نجي لشمارات والي الخرتوم
·كان شفت يا والينا
·زمان الناس كانوا جاريين ورا الدنيا
·جاريين وراها دايرين منها كتير
·الداير يعرس والداير يعمل بيت والداير يشتري عربيه
·عشان كده كنا ساكنها
·اسي الناس يا والينا بقوا جاريين من الدنيا
·الدنيا بقت ساكانا
·دايره مننا
· حق المدارس والعوائد والضرائب ودعم الطلاب ودعم الشرطه والزكاه
·لكن نجري علي ويييييييييييين يا والينا ؟؟؟؟

سلك كهرباء
ننساك كيف والدنيا ساكانا ,,,, هو جنس سك !!!!
والي لقاء
سلك