نص حوار هيثم فى الشروق

نص حوار هيثم مصطفى مع الشروق

* المذيع : ما شعورك هيثم وأنت توصف ب “الكابتن السابق للهلال” ؟

- بسم الله والحمد لله على كل شئ. دوام الحال من المحال ودي طبيعة الدنيا.

…

* المذيع : كابتن علاء ،، كنت متوقع الشطب ؟

- والله بنسبة 90% كنت متوقع الشطب لأنو رئيس النادي قال لي كم مرة أنا حأشطبك.

- ماف زول من الإدارة بلغني بالشطب وعرفت زيي وزي أي مشجع. بل حتى التمارين ما كانوا ببلغوني بيها.

…

* المذيع : كابتن هيثم ليه إتكلمت عبر حبيب البلد ؟

- أول شئ أعتذر لحبيب البلد ولكل الوقفوا معاي ،، أنا ما عملت مؤتمر صحفي لأنو حيكون كم ؟ ساعة ؟ ساعتين ؟؟ ما حألقى راحتي في الكلام. وكان لابد أتكلم عبر صحيفة وفي صحفيين عقولهم مريضة وليهم علاقة بالرئيس الأسوأ. وبرضو صحيفة قوون ماسكة الحياد والوسطية وما كنت عايز مكانتهم تنزل بين الجمهور. إخترت حبيب البلد لأنها حتوفر لي راحتي في الكلام.

…

* المذيع : طيب شايف إنو التوقيت كان مناسب ؟

- جدا” .. التوقيت كان الأنسب وأنا صبرت كتيييير.

- السيد الرئيس ودائرة الكورة والمدرب إتكلموا كتييير خلال سنة كاملة وأنا صابر وبتحمل الأذية عشان الهلال كانت عندو مباريات مهمة وما كنت عايز أضر بالفريق.

…

* المذيع : طيب إنت قلت إنو الرئيس الأسوأ ؟

- كل الإحترام والتقدير لأسرة البرير لكن نفصل في العلاقات.

- لمن سألوني عن رؤساء الهلال كنت حأكون منافق لو ما قلت الحق. عندك الطيب عبدالله، صلاح إدريس، عبد الرحمن سر الختم، … ، من العيب أن أقارن الرئيس الحالي مع هؤلاء الرؤساء القامات.

…

* المذيع : طيب كابتن هيثم : كلهم “يقصد الرؤوساء السابقين” دخلت معاهم في مشاكل .. طيب الغلط من منو ؟

- إنت ليه بتسميها مشاكل ؟ دي مجرد إختلافات في الرأئ وبتحصل عادي حتى بين الأخوان في البيت.

- أنا ببدي رأئي : الصاح صاح، والغلط غلط وما حأتكلم عن الطيب عبدالله لأنو إتوفى.

- أنا ما حأرد ليك عن شخصيتي لكن أسأل جميع العاشروني.

…

* المذيع : كابتن علاء : آها إنت رأيك شنو ؟ هيثم ده بتاع مشاكل ولا كيف ؟؟

- هيثم بعرف حاجة واحدة : “الحق”. ودي الحاجة القربت بيناتنا.

…

* المذيع : العلاقة بينك وبين هيثم كيف يا علاء ؟

- العلاقة بيناتنا أسرية. وهو الحبب فيني الهلال وخلاني “ومعاهو الأرباب” أعشق الهلال بصورة كبيرة.

- هيثم ما برضى الظلم للعيبة وبشيل هموم الباقين على حساب نفسو، ولي أسي ما أخد حقوقو لأنو كان بقاتل عشان حقوق الآخرين.

…

* المذيع : طيب بقولوا إنك إتشطبت عشان تابع لهيثم .. ؟

- البتقال كتير لكن حتى ولو : أنا فخور بإني أكون تابع لهيثم.

…

* المذيع : كابتن هيثم ،، لو إنت في مكان البرير وحصلت المشكلة دي حتعمل شنو ؟

- البخليها تصل للمرحلة دي شنو أساسا” !! أنا ما شفت في الدنيا رئيس بعادي لاعب معاهو بالطريقة دي. مفروض يكون في نقاء بين أي إتنين شغالين مع بعض.

…

* المذيع : طيب بعد ما العلاقة إتصلحت ومشيتوا عطبرة سوا ،، الحصل شنو تاني ؟

- تصحيح بسيط : نحن ما مشينا عطبرة سوا. وعشان الهلال ما عشان البرير أنا مشيت عطبرة.

- إتصلت على السيد الرئيس وإستأذنت منو ووافق. قلت ليهو لو إتوفقت بديكم تلفون عشان تجوا. وفعلا” بحمد الله إتوفقت وإتصلت عليهم وجوا.

…

* طيب لي أسي ما وريتنا المشكلة شنو بالضبط ؟

- المشكلة كبيرة شديد .. في مجموعة من الناس كانت بتغتال فيني معنويا”، مدرب من أول يوم يتكلم معاي بأسلوب غريب، في أي مؤتمر صحفي كانوا بحاربوا فيني.

…

* المذيع : إنت قلت إنو الأرباب أفضل من البرير … ؟

- أنا قبل شوية ذكرت ليك 6 رؤوساء ومن ضمنهم الأرباب وما ممكن القامات ديل يتقارنوا بالرئيس الأسوأ “البرير”.

…

* المذيع : بقولوا إنك إتفقت مع صلاح إدريس ضد البرير ؟

- والله العظيم الأرباب ما إتكلم معاي وقال لي ضر بالهلال.

- نحن زمان كنا بنتعامل مع دائرة الكورة وهي الوسيط بيننا والمجلس.

- كنا بنتعامل مع فوزي المرضي كأخ وصديق وأب، كان مقرب مننا جدا”. ومرات اللعيبة الواحد بلعب مصاب عشان علاقتو بفوزي.

…

* المذيع : طيب دائرة الكورة عندها علاقة بشطبك ؟

- دائرة الكرة داخلة في القرار.

* يلمح المذيع لحمد كمال والإرهاصات بأن سيدا “حفظه الله ورعاه” كان السبب في شطبه :

- لو عندكم مصحف هنا في الأستديو أنا متوضي ومستعد أحلف والله العظيم وأقسم بالله العظيم ما حصل شطبت لاعب في حياتي.

- أي رأي شخصي في اللاعبين بحتفظ بيهو لنفسي لأنو في جهاز فني وإدارة ودائرة كرة بتقيم اللاعب وهم البقرروا.

- وبعد ده بتفضل العلاقة طيبة مع اللاعبين البمشوا.

…

* المذيع : طيب مش كان في خيار أفضل بدل الشطب .. بأن تعتزل ؟

- أعتزل .. ليه ؟ أنا حاسي إني قادر على العطاء والدليل الكور الدخلتها. وما عشان واحد حأخلي الكورة.

- أنا كنت عايش في عذاب .. من أول يوم عرفت غارزيتو بإني كابتن الفريق إتكلم معاي بطريقة ما مقبولة.

- غارزيتو وأنا قاعد كان بمشي للعيبة ” ما عايز أذكر أسماءهم عشان ما أجيب ليهم مشاكل، لكن أخد قدامك علاء الدين المشطوب ده” .. وبنقل ليهم الوصايا بتاعتو !!

- بجي التمرين بقول لي أمشي إتمرن مع الأشبال !!

- دائرة الكرة بتضرب لي وتوريني التمرين وبجي جاهز بلاقيني غارزيتو بقول لي الجابك شنو ؟ ده ما تمرينك !!

…

* المذيع : غارزيتو قال إنت فرضت عليهو حاجات زي إنك تلعب أساسي في كور الولايات وكده.

- أنا ما فرضت عليهو أي حاجة وهو لو ما مقتنع بي يقول لي أقعد في البيت ما مشكلة، لكن لو مقتنع بي ما تعاملني بالطريقة دي !!

- أنا إحترمتو شديد وما إتطاولت على الهلال وكنت بسافر وبقعد إحتياطي وما بلعب.

…

* المذيع : إنت لمن تخش في آخر ربع ساعة أو 10 دقائق بتخت في بالك إنك تلعب كويس عشان تحرج المجلس ودائرة الكورة والمدرب ؟

- لمن أخش الميدان حامل شعار الهلال بكون قدامي بس أساعد زملائي وأخدم الهلال.

…

* المذيع : آها إنت يا علاء مشكلتك شنو بالظبط ؟ قروش، إختلافات ساي، … ؟

- أنا إتكلمت في حقوق عبارة عن حوافز لشهرين. وأكون معاك صريح، الفترة ديك كانت صعبة جدا” وما عندي قروش وخاشي علينا عيد وكنت فعلا” محتاج للقروش.

- إتكلمت مع خالد وقلت ليهو نحن معتمدين على الحوافز يا خالد لأنو ما عندنا حاجة نعملا غير الكورة. ووصلنا الكلام للمدرب لكن قال لي رئيس النادي بحل في مشاكل إيفوسا وإمبيلي وماف طريقة. أنا طوالي قلت ليهو الإتنين ديل إنت ما حضرتهم وأنا أولى منهم لأننا محتاجين.

- بتذكر تاني يوم كانت كورة القمة في الكونفدرالية وجاني تلفون إنو أمي عيانة. فأتصلت على المترجم عشان يكلم المدرب، المترجم رد لي برد غريب ضايقني : أهم شي تشوف صحة أمك، ولو ما لقيت طريقة ما تجي !! وإتفاجأت تاني يوم بإني برة ال 18 !!

- كنت بعاني من آلام البطن بس برضو كنت بجي عشان حب الهلال.

…

* المذيع : كابتن هيثم .. ما حاسي بالندم على الحوار ؟

- أي حرف قلتو راضي عنو تماما”.

- الحاجة الوحيدة الفاقدها هي إحساس الجمهور، الإرتباط بيني وبين الجمهور.

…

* المذيع : بقولوا إنت بقيت ورقة ضغط في يد المعارضة … ؟

- الوسط الرياضي أصلو كده. وفي واحدة من الصحف قالوا مشيت للكاروري وإتفقت معاهو ضد البرير في حين إنو الكلام ده ما حصل.

…

* المذيع : أحمد آدم قال ليك شنو ؟

- الرسالة الوجهها لي الكابتن أحمد آدم ما متوقعة منو.

- أنا قلت ليهو إنت في زول أجبرك تعتزل ولا كتبت خطاب إعتزالك براك ؟ قال لي براي .. قلت ليهو خلاص كده إتفقنا وده قراري براي زي ما كان قرارك براك.

…

* المذيع : كان في شي يشبه القدسية “والقدسية لله” أو في إجماع عليك يا هيثم .. أسي بعد الحوار في إختلاف، رأيك شنو ؟

- في ناس نكرت إني قعدت 17 سنة كأني جيت أمس.

- لكن جمهور الهلال بقدر لعيبتو ومتأكد لو أي لاعب قعد شهر واحد بس في الهلال وحصل ليهو كده، جمهور الهلال حيقيف معاهو.

…

* المذيع : من كلامك إنت سعيد مما يحصل “يقصد الإعتصام لأجل البرنس” ؟

- بحب أوجه رسالة للجمهور : بشكرهم كلهم، وهم السبب إني أصل لما وصلت له، لكن جات لحظة إني أمشي. خلوا هيثم وعاينوا للهلال لأنو محتاج ليكم، وأتمنى إنكم تفكوا الإعتصام. إنتو زعلانين وأنا زعلان لكن بغض النظر عن الحصل .. الهلال محتاج ليكم، ومنو البقودكم ما مهم لأنو الهلال محتاج ليكم “يبكي بحرقة”.

…

* المذيع : ماذا عن المستحقات ؟

- السؤال مفروض يكون : أنا عندي حق ولا لا ؟ … أنا عندي حق وقدام الكل حقي أنا حأقاتل عشانو للآخر وإن شاء الله حأتبرع بيهو للجنة المسجد بتاع الهلال.

- وده ما موضوعنا إنو عندي حق … دي مشكلة بين الهلال والإتحاد.

…

* المذيع : ماذا عن تدخل أسامة عطا المنان وإيقاف الشطب ؟ هل بحكم العلاقة الشخصية بيناتكم ؟ وقبل كده مازدا قال إنك رجعت للمنتخب لأسباب معنوية ؟

- أول شئ الشكر لجميع أعضاء الإتحاد ولمازدا وأعضاء الجهاز الفني والإداري للمنتخب.

- بالنسبة لي أسامة قامة كبيرة. والمنتخب ما عندو وجيع غير أسامة. هو الوحيد الكان مهتم بالمنتخب في البلد دي وبصرف عليهو من حر مالو. نحن عشنا معاهو كتيير.

- كنت بتمنى نكون في النهائيات القادمة لكن الحمد لله.

- غارزيتو يريد التدخل في كل شئ حتى التدخل في تشكيلة المنتخب ويقول ما يشاء في ما لا يعنيه ولا يوجد حسيب.

…

* يتدخل المذيع : لكن غارزيتو مدرب كبير ..

- يرد هيثم : أي فرق كبيرة درب ؟

* يرد المذيع : مازيمبي.

- هيثم : أول شي مازيمبي عندو الطرق البتوصلوا للكاس.

* المذيع : لكن هو وصل الهلال نصف النهائي …

- “يقاطعه هيثم” : نصف النهائي وين ؟

* يقول المذيع : الكونفدرالية.

- هيثم : والهلال كان بصل وين !!؟؟!

* المذيع : لكن هو لقى ظروف صعبة وقدر إنو يوصل الهلال لنصف النهائي … ؟

- هيثم : طيب هو لقى الهلال وين ؟ الهلال وصل بمجهودات اللاعبين وصراحة المدرب ده ما في قامة الهلال وما عايز أتكلم عن التكتيكات وكده عشان ما يقولوا منظر لكن نحن طرنا من الشلف !! ومع إحترامي للشلف لكنه ليس بالفريق الذي يخرج الهلال !!

…

* المذيع : وإنت يا علاء طلعت من المريخ بمشكلة وأسي من الهلال بمشكلة .. ممكن نقول علاء بتاع مشاكل ؟

- أقول ليك حاجة : قبل ما أسجل للهلال في مريخاب كتار ورئيس النادي إتصلوا علي عشان يقنعوني بالبقاء.

- أنا طلعت من المريخ بإحترام على عكس الهلال.

- أنا لعبت في الهلال 6 سنوات وبعتبر فترة ال 4 سنوات قبل السنتين الأخيرات ديل فترة جميلة وكنت سعيد جدا” إني بلعب في الهلال. أما السنتين ديل فيهم ندم وإتساءلت أنا غلطت لمن طلعت من المريخ ؟

- في الفترة الأخيرة كنت بخاف من أي كورة لأنو أي غلط كان بتحسب إني متواطئ !! وفي كورة المريخ غلطت غلط عادي “مصعب قطع مني الكورة” تاني يوم طوالي قالوا أنا متواطئ وجلست مع واحد من ناس المريخ وإستلمت 15 مليون وبعت الكورة !!

- زي ما قال ليك هيثم : قالوا وقلنا دي كتيييرة. لكن يصل الموضوع لدرجة إنهم يحددوا المبلغ “15 مليون” ويحددوا الزول القالوا أنا قعدت معاهو ده ما صاح !!

- هم بقولوا إني إستلمت 15 مليون في حين إننا لو غلبنا المريخ كنت حأستلم 18 مليون !!

…

- هيثم : جمعني إتصال بكبار الهلال بعد الحوار وقلت ليهم : أنا عايز ألعب للهلال والبتشوفوه إنتو أنا بقبل بيهو .. وتاني يوم إتشطبت.

- ما أتيحت لي فرصة إني أخاطب الجمهور، أسي بخاطبهم : إنو عليهم يقيفوا مع التيم وجمور الهلال واعي وأوعى مني ومنك. وبتمنى إنو الإعتصام ال في النادي خلاص ينتهي.

- أنا ما حأعتزل وإذا إعتزلت الكورة معناها نصرت شخص علي.

…

* المذيع : وجهتك القادمة ؟

- في الوقت ده أقتدي ليك بدعاء الرسول صلى الله عليه وسلم : “اللهم إنك أخرجتني من أحب البلاد إلي فأسكني أحب البلاد إليك”.

…

* المذيع : طيب ممكن تمشي المريخ ؟

- المريخ نادي كبييير وليهم إحترامي وتقديري. ما حصل أي إتصال بيني وبين المريخ ولا أي تيم في السودان.

…

* المذيع : باقي للإنتقالات 6 يوم … هل هي كافية لكي تنتقل ؟

- ما حصل أي إتصال مباشر بيني وبين أي تيم حتى الآن.

…

* المذيع : طيب من هنا نقول هيثم حينتقل … ؟

- أسوق نفسي عبركم يعني ؟؟ “يضحك”

…

* المذيع : طيب لو عملوا ليك تكريم إعتزال … ؟

- هيثم : أنا ما حأعتزل.

…

* المذيع : وماذا عنك يا علاء ،، في أخبار عن مريخ الفاشر ؟

- أنا يوم بكرة بحدد ألعب وين .. ومع إحترامي لمريخ الفاشر وكل الفرق في السودان لكن حاليا” بدرس في عرض إحتراف وحأقرر قريب.

…

* المذيع : هيثم ،، ماذا عن عمر بخيت ؟

- عمر يمثل الوفاء للهلال .. ولو عندهم ذرة من التقدير مفروض يجددوا لعمر.

- ما ممكن تخليهو لي أسي وباقي أيام على نهاية التسجيلات وعمر أقدم من مهند وبعد ده جددوا لمهند أول … كان ممكن تسوقهم الإتنين وتتفق معاهم.

- عمر ده الكابتن وما مفروض يتعاملوا معاه كده.

…

* المذيع : رسالة للجمهور ؟

- جمهور الهلال جمهور راقي، جمهور حبيب وقريب للقلب، وأي لحظة جميلة عشتها بسببكم. بشكركم كتييير، وبشكر رئيس الجمهورية على مبادرتو، وبشكر قدامى اللاعبين : شوقي، فوزي، جكسا. وبشكر الجميع على وقفتهم معاي.

- الجمهور في النادي : العفو والعافية بتمنى نكون صادقين مع بعض وبتمنى إنو الإعتصام ده خلاص ينتهي لأنو الهلال محتاج ليكم وبيوتكم محتاجة ليكم.

…

* المذيع : هل من الممكن تعود للهلال كإداري مثلا” ؟

- والله شوف ما عارف الحيحصل وبعد ثانية أنا ما عارف حيحصل شنو.

» حوار هيثم مع جريدة الصدى
» لقاء هثم وعلاء الدين فى الشروق
» اخر حوار للشغيل قبل انتقاله للهلال
» حوار اللاعب علاء الدين للصدى
» حوار اللاعب علاء الدين للزعيم